الخميس، ١٤ مايو ٢٠٠٩

عروسة ماما


أولا أحب أشكر كل من علق على البوست اللى فات
وكل ما تمنيتوه لى من سعادة ودعواتكم
و أريد أن أنوه عن شئ أنها ليست قصتى بل قصة أحد أصدقائى
والموضوع ما كملش ، الحمد لله الذى لايحمد على مكروه سواه .
وده هيكون موضوع النهاردة


هحكيلكم على قصتين وأنتم تقرروا وتدونى رأيكم

___________________________

لما واحد يكون عنده 31 سنة ولسة مش قادر يقرر ولا يختار إنسانة يتزوجها وعايز مامته تختار العروسة،

ومامته ماعندهاش ثقة فى اختياره ، ويروح يحب واحدة ويعلقها بيه وبعد كده يقولها ماما مش موافقة ، إزاى واحد فى السن ده ومش قادر يختار.



القصة التانية واحد بعد مايروح لواحدة ويقولها أنا معجب بيكى وهتقدملك بعد النتيجة وأنا إنسان مرتاح ومش مستنى الوظيفة وفى نفس الوقت بعد حوالى ساعتين يتصل ويقولها ، أنا كلمت بابا ومش موافق ، يعنى هل يوجد إنسان مش عارف تفكير باباه إيه ، وبيكلم بكل ثقة وغرور إنه هيجى ويتقدم وعملها من البحر طحينة ويمكن كان عايز يدخلها من منطقة الزواج لأنه لم يجد سكة تانية غير ده فهى جادة جدا ، ولما لم يجد جدوى من ذلك قالها بابا مش موافق يعنى دول رجالة.



هنا نأتى لبعض الأسئلة التى تعبت من التفكير فيها



ليه الولاد بيحبوا يعشموا البنات تحت ستار الحب ، وعندما يأتون لمرحلة الزواج يخلى ماما تختار العروسة؟

هو لايستطيع اختيار الانسانة التى يريد الزواج بها ، فكيف سيختار بعد ذلك فهو عاجز عن اختيار شئ

ليه الولاد بيقولوا الكلمة المشهورة ، البنت اللى أمشى معاها مااتجوزهاش

فيه كلمة قالها واحد قديم شوية من الجيل اللى فات، أنا اتعرفت على مراتى فى الجامعة ولما اتخرجنا اتجوزنا ، ليه دلوقتى لو حبوا فى الجامعة مايتجوزهاش ، كده عايز يتجوز واحده واحد غيره حبها .
لما كل واحد مصرح ليه يعرف عشرين واحدة قبل الجواز ، هنجيب منين بنات معرفتش شاب
وكل واحدة حبت واحد وكانت فاكرة انه دنيتها تترهبن وتعقد من جواز
ليه كل الولاد مش بيحبوا الصراحة لو صارحتهم واحدة بانها حبت قبل كده


أنا تعبت من مشاكل صحابى لأنها كلها شبه بعض

لما أنا كل أمنيتى إن أقابل إنسان أحبه ويحبنى ونبنى حياتنا مع بعض ونتجوز

أفقد الأمل فى وجوده بسبب التفكير ده

يبقى عمرى ما هلقاه ،

إحنا فى القرن الواحد والعشرين ولسة الولاد بيخلوا ماما تختار العروسة،

وممكن نقول هى عروسة ماما مش هى اللى اختارتها

*************************


يمكن عنيفة فى كلامى لكن أنا خلاص تعبت مما أراه

أعتذر عن الإطالة
اعتراف جنننى

هناك ٢٣ تعليقًا:

romansy يقول...

اول تعليق

ل


رومانسى

احساس طفلة محبة للرومانسية بس واقعية يقول...

متتعقديش من الشباب دول يا شيمو
دول يستحقوا الشفقة مش التعقيد من سلوكهم هم اللى غلط وتفكيرهم غلط

وممكن كمان نلتمس ليهم العذر ويكونوا عايزين يرضو ماماهتهم وتكون المشكلة فى الامهات والتربية اصلا

بصى تتعد العلاقات الانسانية
والنتيجة واحدة فى الاخر
هل فى اخلاق وتدين عند كل طرف
عشان يقدر يكون زوج او صديق او حبيب
زميل حد نتعامل معاه حتى لو مرة فى حياتنا ونحكم احنا كمان على نفسنا
مش على الاخرين بس

مش كل الناس سيئة لسة فى علاقات محترمة
ولسة فى شباب بيكون ليهم قرار واستقلالية وبيحترموا الحب والزواج وبيفضلوا علاقة شرعية
وفتايات مش بيعرفوا غير شاب واحد

المهم متفقديش الامل وتشوفى الامثلة السلبية بس

تقبلى مرورى

romansy يقول...

الولاد مش بيلعبوا بالبنات بس اوقات كتير بتكون الظروف صعبه وبتبقى حجه بابا وماما دى
الحجه اللى قدام الشباب بس اتمنى ان كل انسان يلاقى الانسان اللى بيحبه

♥نبع الغرام♥♪≈ يقول...

السلام عليكم
شيمو القمر
بجد تسلم إيديك ياحبيبتى الله عليك
تعرفى انهم اصلا ما يعرفوش يعنى ايه حب وبيتسلو بالبنات وفى الاخر يقولو ماماى
ماما مين كله ضحك وكدب على البنات ياشيمو
احنا بنتعلم
ياما شفنا وحصل لنا كتير من ده
ربنا ينتقم من اى ولد يعشم بنت
وهو ما يعرفش انه كله سلف ودين
يلا الحمد لله

♥نبع الغرام♥♪≈ يقول...

الحب إدعاء وخداع ووسيلة اصطياد لإقامة علاقة سيئة مغلفة بالحب تتدرج على خطوات كل خطوة في هذه العلاقة تجر وتجعل ذلك المحبوب رهينة لخطوة أكبر منها تحت سلاح الإغراء او التهديد بالفضيحة الى ان يجره الى الكارثة, وهذا الشخص كالشيطان يغري الانسان بالكفر حتى يقع فإذا وقع تخلى عنه وتبرأ منه, قال الله تعالى(...كمثل الشيطان إذ قال للانسان أكفر فلما كفر قال اني بريء منك اني أخاف الله رب العالمين) صدق الله العظيم.
تقبلى تحياتى
أختك نوسه
وعلى فكره انا ان شاء الله هنزل بوست جامد قووى عن الموضوع ده
عشان كل البنات تحترس من الشباب
تبعينى دايمآ
اختك انوسه

ريمان يقول...

السلام عليكم


شيمو

عارفه انا لو اتفتحت فى الرد ع المووضوع ده هلبخ الدنيا وهخبط فى الحلل كمان


وعارفه ان اى راجل هييجى يعلق عندك تاكدى انه هيزوق كلامه

لكن انا واثقه انه ساعه الجد مش هيعمل غير اللى انتى قولتى عليه فى البوست بتاعك ده

الا من رحم ربى بقه

انا برضه اصحابى شوفتلهم حكايات كتيره من دى

ووالله بتعب برضه ومش بعرف احل اى مشكله من دى تقابلنى

وطبعا اللى اكلمتى عنهم دول مش رجاااااااااله


الراجل راجل بكلمته وبتصرفه

اى نعم قبل كده اللى كان بيحب واحده ايام الجامعه بيجوزها

يعنى افتكر ان خالتى كان بيحبها واحد ايام الجامعه وعشان هو من بلد تانيه جدى مكنش موافق على جوازهم بس هو حارب الدنيا عشان يجوزها وحصل الجواز بينهم والوقتى ما شاء الله عايشين فى سعاده

انما الوقتى صعب انك تلاقى حد بيجوز واحده بيحبها

خصوصا الراجل قصدى مش الراجل اللى بتاع ماما وبابا اللى يقولك اصل ماما مش موافقه

طبمن الاول بلاش يعشم البنات ويبقى يعرف راى ماما وبابا من قبل ما يعشمها عشان مش يبقى كده حرام عليه


لكن هنقول ايه ولا ايه

يلا بقى


تحياتى ليكى يا قمر

بـسـمـــة صـــــلاح يقول...

ايه ده هو انا فاتني بوست انتي حطيتيه امتى انا الريدر عندي بايز
وعايز تأديب

بـسـمـــة صـــــلاح يقول...

ايه حكايتكوا انهرده انتي ونوسه

تعرفي انا الموضوع دا هيجبلي شلل
بجد متعب لاخر درجه

انا كمان صحباتي حبايبي غلبت عشان اساعدهم والاقيلهم اي حل
بس ازااااااااااي
خايفه يضيعوا قدام عيني
بس بنصح وبوجه وربنا يستر

صحيح صعب دلوقتي تعرفي الكداب من الصادق بس دا ميمنعش ان في ناس بتكون صادقه

اكتر كلمة تغيزني لما يقولوا للوحده صوابعك مش زي بعضها

بس تعرفي والله نوسه حطت صورة في البوست بتاعها جامده جدا

انا حاسه ان الموضوع دا شتتني اوي
لو اتفتحت مش هخلص
دا انا شايله جوايا ومغلوله اوي بعيد عنك
بس كل اللي بتمناه ربنا يحمي البنات كلهم
وينتقم من كل واحد كداب ومخادع
انا بدعي عليهم دايما على فكره

ربنا مش هيسيبهم

سوري ع الرغي
تقبلي مروري ياشيمو

ادم المصرى يقول...

انا بجد اكلمت كتير فى الموضوع ده بس هلخص كلامى هنا

اولا دا بيكون راجع لضعف شخصيه ثانيا قله ايمان بلا ثالثا ترك العقيده والمنهج الذى كان يمشى بهى السلف الصالح

رابعا الاساس الاساس الاساس مكنش حب ولكن كان تسليه وتضيع وقت وفرااااااااااااغ

حاسوباتيه يقول...

بصي هقولك حاجه من وجهه نظري وارجوا ماتزعليش مني ولا تفهمي قصدي غلط انا هكلم عموما

في رايي في نوعين من الحب الاولاني الحب الجميل البرئ الصافي الي اصبح نادر
وهو الحب بقى المحترم الي لا فيه خروج سوا ولا يمسك ايدها ولا بحط ايده على كتفها ولا الكلام ده خالص وده حب يفرض على الطرفين احترامه ومش يقلق الولد ولا يمس البنت باي كلمه ولو الراجل ده عمل زيي ماقولتي وراح جاب عروسه ماما برغم ان حبهم كان مجترم يبقى هو الخسران والبنت هي الي كسبت ان ر بنا ماوقعهاش في راجل بتاع كلام ماما

اما الحب التاني فهو الارتباط الي فيه بقى خروج وفسح ويمسك ايدها والكلام ده بيني وبينك ليه حف انه يسيبها ويجوز غيرها لانها معلش ما احترمتش نفسها ولا حبها ولا اهلها انا مش بدي مبرر للولد ماهو برضو غلطان انه ماحترمش نفسه بس صدقيني دول لو اجوزا هيفشلوا اصلا فبلاش منها الجوازه

ده رايي و اسفه للاطاله وعموما الي يسمع كلام مامته وبس يبقى مش راجل ولا يغتح بيت

الأمير يقول...

بسم الله ...

اولا السلام عليكم ..

فى معظم الردود اللى فاتت
كان الهجوم على الشباب بشكل كبير اوى

وعجبنى جزء من رد ريمان
وعجبنى رد الاخت

حاسوباتيه

اما ردى انا فهو :

ليه حضرتك بتعممى الامر
يعنى بتقولى ( الولاد )
وكمان ( كل الولاد )
اولا كلمة ولاد مش مناسبه للموضوع
بمعنى انهم لسه صغيرين ومش بتوع جوااز على الاقل دلوقتى ... يعنى مش شباب ..

ثانيا التعميم ده ظلم .. معاكى ان نسبه كبيره منهم كده
بس على الاقل ... العدد لم يصل الى مائه فى المائه !!!

وكمان عاوز اقول ..

فين عقل البنت اساسا ..
يعنى هى هتصدق كل حاجه بلا تمييز !!

وهى ايه اللى وصلها ليه وخلاهم يتكلمواا ..!!! وحتى لو اتكلموااا
وقالها حاجه من النوع ده ...
هى تختصر وترد بإقتضاب وتقوله باب بيتنا مفتوح ..
اظن سهله ... فليه هى بتعيش نفسها فى وهممم ؟؟!!!!!!!!!

وبعدين مش ماما دى برضوا تنتمى الى الجنس الاخر .. يعنى هى كانت بنت اساسا ..

طيب ده لا يعنى شىء ...؟؟!!!

لو البنت بجد التزمت وحكمت عقلها
هتكون كسبانه فى جميييييييع الاحوال

---------------


بعد كل ده .. انا فعلا بلوم الشاب اللى بيعمل كده
ومش بس بلومه .. انا وللاسف احتقره
لانه ولا راعى دين ولا تقاليد ولا اى حاجه ... يبقى فعلا مش راااااجل اساسااااااا

بجد موضوع مميز

احيى حضرتك على اثارته ومناقشته ..

شكرا لسعة صدركم ..؛؛

غير معرف يقول...

بعد التحيه والسلام

كل شئ تواري وضاع حين بعدنا عن الدين فهنا السؤال هل يسمح الدين بهذا ؟؟؟

سواء للشاب أو للفتاه ؟

هل يسمح الدين ان يعرف الشاب الفتاه ويحبها ويجلس معها دون محرم ؟؟

انها كلها اشياء أتت إلينا من خارج البلاد لتستقر في بلادنا بلاد الإسلام

حين تري المناظر امامك في الجامعه هذه تجلس مع هذا وهذا يصاحب هذه ويحب اخري وهي الأخري كذالك

هذا كله يستحق من النكران والمتاعب ما يستحق فهم من تخلوا عن مبادئ الدين

وكما قال رسول الله (ص) في حديثه عن الزاج * فأظفر بذات الدين * وهل الفتاة المتدينه ترضي لنفسها ان تصاحب شاب ؟؟؟؟ هنا يبقي السؤال فأين الجواب؟؟؟؟

بـسـمـــة صـــــلاح يقول...

ايه ده هو انتي قصدك على الشباب اللي بيخرجوا مع البنات وكدا
يعني
ويقعدوا مع بعض

هقولك حاجه رايي بصراحه في الموضوع دا

ان البنت غلطانه انها رضيت لنفسها كدا
ومعتقدش في دلوقتي حد بيفكر في وحده خرجت معاه ابدا هيقول خرجت معايا هتخرج مع غيري

يعني المفروض البنت من الأول هي اللي هتمنع الكدب والكلام دا عن نفسها


المشكله ان البنات بيفكروا بقلبهم
والعقل دا بيتركن على جنب لحد ما يصحوا على اللي يصحيهم

الكلام في الموضوع دا مختصر في حاجه بسيطه
لو سمعنا كلام ربنا ورسوله مش هيحصل اللي بيحصل دا
بس تقولي لمين

وعلى فكرة والله بجد في اولاد بيحبوا بصدق واخلاص ونيتهم بتكون حسنه
بس مش الحب اللي بيكون في مقابلات دا



بجد ربنا يحمي بنات المسلمين ويهديهم
ويهدي الشباب يارب

ويجمع كل قلبين بيحبوا بعض بصدق بالحلال
تحياتي

ميرا كووول يقول...

وداعا للحب فى زماننا هذا بجد لا يوجد نهائيا ده رأى الشخصى وانا كونته عن طريق تجارب كثيرة شوفتها وتعايشت فيها ومعها وانا بقول كل الولاد فعلا مستحيل يكملوا مع بنات كانوا يعرفوهم سواء زمالة او صداقة او تحت اى مسمى وفى الاخر الحجة كا لمعتاد اهلى عموما سواء بابا ماما يعنى وانا بقول الشباب ليس عليهم اى لوم اوعتاب الغلط من الاساس على بنات اليومين دول يعنى علينا احنا اللى بنعمل كده فى نفسنا وبعدين نرجع نقول ليه الولاد بيعملوا كده وليه وليه يعنى بنضحك على نفسنا

طـائر الليــل الحـزين يقول...

يااااااااااه ده بقى مرض العصر
الكلمة دى بقت عادية جداااا مع الولاد
يحبوا ويفضلوا فترة كبيرة
واول ما نيجى للجد تيجى بقى الظروف اللى مش نافعة
او ماما معترضة وبابا معترض
او فى ظروف قوية تمنعنى
مش عارفة فى ايه
لما هما كده وملهم راى ولا شخصية
يبقوا يروحوا يحبوا ليه بقى
من الاول يخلوا ماما وبابا يختاورا لهم
حتى يوفروا فى الوقت
للأسف حتى قصص الحب بقى فيها كدب ومشاعر زايفة كتير
رحمنا يرحمنا ويستر علينا
تحيااااااااااتى يا قمر

safa7_karmooz يقول...

على فكرة فيه مشكلة ان فيه ولاد بيبقوا عندهم خوف من المسئولية ...

زى ما بنشوف فى الافلام الاجنبى كده ...

اهم دول من عينة عروسة ماما ^_^

ذو الوجه المبتسم يقول...

السلام عليكم ورحمة الله

مبدئيا موضوع البوست جميل بجد ومش عاوز اقول ان فيه كتير اتكلمو فى الموضوع ده
بس هاقول لك حاجة مهمة

ممكن يكون آخرون من الاصدقاء قالها

اولا اعترف ان فيه شباب كتير فعلا بتلاعبو بالمشاعر والاحاسيس ولا يضعون لها اى اعتبار طبعا مش كل الشباب والا ستظلم كثير منهم
ثانيا : قلت قبل كده ان كتير من الاحيان بتكون البنت سبب رئيسي فى هذه الخدعة او المخادعة لانها مفتاح العلاقة
وبايدها تقول اه او لا وبايدها تحديد العلاقة

مبدئيا متحيريش نفسك
لان اللى حصل واللى بيحصل واللى هيحصل
تقريبا متشابه
ورغم النصائح مش هتقدرى تمنع الكلام ده

يبقي البنت تقرر بنفسها مصير علاقتها من البداية

تقبلى تحياتى

عاشقه الرومانسيه يقول...

اى شاب بالمواصفات دى يبقى خساره فيه كلمه راجل
دى عيال فرافير
اما عن
الكلمة المشهورة ، البنت اللى أمشى معاها مااتجوزهاش
فانا اتربيت على ان اللى يمشى مع بنت مش بيتجوزها وده راجع لسبب مهم
انه بيكون عنده شك ان اللى مشت معاه ممكن تمشى مع غيره وهى على زمته
وده بيدخلنا على نقطه تانيه الا وهى ان الانسان ده بيكون مهزوز ومفيش عنده ثقه فى نفسه

اما بالنسبه للبنت فانا لى رأى ممكن ابان منه انى متخلفه او انى جايه من العصور الوسطى

البنت اللى تخون ثقه اهلها فيها وتسمح لنفسها تتصرمح مع اى شاب
بيكون سهل عليها تخون ثقه جوزها بعد كده

مش باتكلم على الحب العذرى الشريف
بس مش هنقطع الدنيا مقابلات وخروجات وغرام وانتقام ونقول عااااادى احنا بنحب
لكل شئ حدود
ومهما كان احنا فى مجتمع شرقى
بيحكمنا عاداته وتقاليده
وكلام الناس بيهمنا بدرجه او باخرى
ده غير ان الاسلام مافيهوش الكلام ده

ده رأيى ولكى كل الحق فى الاختلاف او الاتفاق عليه

فراشة يقول...

ارجع واقولك يا شيمو السبب هو الاهالى مابيربوش ابنائهم على تحمل المسئوليه وتحمل مسئويه الكلمة اللى بتخرج من افواههم
بيقضوا على شخصيتهم تماما تحت اعتقاد انهم فاهمين اكتر وعندهم خبرة اكتر
لازم الاهالى يزرعوا البذرة ويجنوا ثمارها الطيبة
ويتركوها هى الاخرى تزرع وتحصد

هكذا هى الحياة مليئة بالمشاكل
ربنا كريم

هيثــم رمضـــان يقول...

أول تعليق ليه في المدونه وجه في موضوع صعب وأسئله كتيير لكن حرُد عل قد ما قدر. بالنسبة للقصة الاولي اللي عنده 31 سنه وماما اللي هتختار بدون أي تدخل منه ده أصلاً غلط كبير في التربية من الاصل وقصور شديد في الشخصية وأنا بشوف حاجه بتستفزني جداً أحياناً في محلات الملابس ألاقي الواد من دول لامؤخذة قد الباب وماما هي اللي بتنقي اللبس وأفتكر والله إن كنت بشتري لوحدي من إعدادي.
أما التاني فهو بيقول مش مستني الوظيفه يعني هياخد مصروف من بابا واللي لا يملك قوته لا يملك قرارة وأنا شايف إن هي اللي ماتوفقش حتي لو بابا وافق لانه لا يصح إلا الصحيح الراجل يشتغل ويصرف علي بيته في حدود إمكانياته.
أما باقي الاسئله كتير وأنا طولت لكن هقول بإختصار إن ده كله ناتج عن تدني الاخلاق وعدم التدين والقصور في التربية وعدم الشعور بالمسؤلية وفهم خاطىء لكلمة الرجوله فالرجوله هي الشعور بأنك مسئول وأن تكون لديك الحكمة والعقل في جميع تصرفاتك ,وأيضاً الفهم الخاطىْ لكلمة الحب فهو ليس كلمات حلوة وأوقات لذيذه ..ألخ لكنه إحساس من كل طرف بالرغبة علي إسعاد الطرف الاخر والحرص عليه والتضحية من أجله وده مش كلام إنشي والله لكن هي ديه الحقيقة والصح واللي المفروض يكون ولو كل ولد وبنت أختار صح وعلي الاسس الصحيحة مش هيكون في مشاكل لكن البنت تحب أو تتوهم إنها تحب إنسان تافه ,سطحي,عديم المسؤلية وعديم الاخلاق ثم عندما يتصرف بناءً علي هذة الصفات تبكي حظها وتنسي إنها من إختارت في البدايه.
وعلي فكرة أنا خريج 1997 ولغاية دفعتي كان في زمايل معانا إتجوزوا بعض فعلاً لكن مش عارف دلوقتي إيه الوضع لكن أكيد وحش بسبب الظروف الاجتماعية والاقتصادية.معذرة أنا طولت قوي لكن الموضوع يستاهل أكتر من كده

شيماء جمال(شيمو القمر) يقول...

لم أرد على التعليقات ولم أرد الفصح عن ماذا أعنى من الكلام الذى قلت
ولكن أردت معرفة آراءكم فى هذا الموضوع
وقد اعتدت أن أحترم آراء الآخرين
وأختلاف الرأى لا يفسد للود قضية

وأشكركم على التعليقات
شيمو القمر

غير معرف يقول...

موضوع رائع ومشكلة فعلا كانت لازم تطرح من زمان

حبيبتي ...إذا سألت عن السبب

فالبنت هي التي ترمي بنفسها في ذلك

نعم فالحمد لله اسلامنا جميل وبيصونا كلنا ليه البنت تتطر تعمل علاقة مع شاب حتي ولو بتحبه

مادام في حاجة في الإسلام اسمها خطوبة ودي الإسلام عاملها علشان الإتنين يتعرفو علي بعض

ليه دايما بنختار الحرام والحلال في إيدينا

ليه دايما نلاقي البنات يعيني نفسيتها تعبانة علشان فلان حرجحها وفلان ضحك عليها

وفلان وعدها بالجواز ومااتجوزهاش

ليه هيا تفرط في كرامتها بسهولة كده

أنا في وجهة نظري إن البنت اللي تمشي مع ولد بدون ما يكون بينهم علاقة شرعية

دي بنت بتبيع كرمتها وبتوهم نفسها بحب زائف أو بالأحري ده أصلا مش حب

أنا مؤمنة بمبدأ واحد وهوا ..

كل حب دون الله خسران

وكل مشاعر لا تجد الله فيها أخرها حسرة وندامة

بجد علشان احنا ضيعنا فروض ربنا ونسينا دينا

فدي كانت النتيجة شباب محبط وشباب غرقان في مشاكل هايفة جدااا

سامحوني لو كنت يبتكلم بقسوة

بس أنا غصب عني لما بشوف بلدي بلد متخلفة وبشوف اسلامي مش منتصر مش من حقنا ياشباب نحس بن دينا منتصر ومش من حقنا اننا نعيش حياة رغيدة في ظل الإسلام

ده حلمي ..أمل أن يتحقق

M.S يقول...

عارفة ليه ياشيمو لان الزمن ده مش زمن رجاله ده بءه زمن البنات فيه هم اللي بيتمسكو باختيارهم وبحبهم وعايزين يحافظو عليه انما مفيش راجل اصدي ولد بيقدر يصر علي رأيه ويتمسك بكلمته زي زمان ..مجرد ماحد يشككه في اختياره يتنازل فورا...او يكون السبب انه من الاول كان بيتسلي مش بيحب....وبرده لكل قاعده شواذ لاني مااقدرش اظلمهم كلهم لان لسه فيه بقايا رجالة بيحبو بجد وبيحافظو علي وعودهم ومابيظلموش البنت اللي عطيتهم كل مشاعرها الجميلة.........M.S