السبت، 6 يونيو، 2009

أحلام



ازيكم يا حبايبى
بجد أنا عارفة إنكم زهقتم منى خلاص

بس أن كمان زهقت ، ده التاج الخامس يا جماعة أنا كده توليت العهد خمس مرات ده انا كده أبقى عجزت قوى

أنا بفكر أعمل مدونة للتاجات

التاج هذه المرة جالى من قمرين

عاشقة الأحزان أنوس حبيبة قلبى

بنوتة مرحة أختى الصغيرة اللى محسسانى ديما بالانبهار

بسم الله ...




س1/
أذكر خمس أحلام على الاقل ..تخص ماضيك وتحلم فيها بتغيير اشياء .. ماذا ستعدل وماذا ستترك؟

أولاً:

لو الزمن يرجع بى ثانية سأذاكر جيدا فى الثانوية العامية .... قصدى العامة وكنت دخلت كلية الهندسة اللى حلمى ادخلها لحد دلوقتى مع انى اتخرجت .




ثانيا:

كنت دخلت كلية العلوم وكنت بقيت مدرسى رياضيات مش مدرسة لغة عربية .

ثالثا:

كنت ذاكرت كويس فى الليسانس وكنت طلعت من غير مواد وما اضطرتش انى اعقد سنة كاملة فى البيت مستنية الشهادة .




ملحوظة

أنا ما عنديش ولا حلم اتحقق اصلا علشان احلم بتغيير حاجة فيه

كل احلامى مجرد صور فى عقلى فى المستقبل

وربنا يستر




س2/
أذكر خمس أحلام على الأقل ..تخص مستقبلك ؟

أولا :

أحج بيت ربنا ، وأحس إنى بعمل حاجة صح .

ثانيا :

أتخرج بقى وأمسك الشهادة فى إيدى كده

ثالثا :

اتزوج من إنسان تقى يعرف ربنا ، ونخلف أولاد حلوين قمورين وأعدهم ليكونوا صالحين ، ويحررون القدس بإذن ربى .

رابعا :

أشتغل وأترقى فى شغلى لحد ما أبقى وزيرة التربية والتعليم .

خامسا :

ألاقى البلد كده هادية وكل حاجة رخصت ، والناس بقت تحس ببعض ومش كل حاجة فى دماغهم المادة وبس.




س3/
أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن ....

بصراحة مش عارفة كل الناس اللى فى حياتى وبحبهم أعرفهم من زمن ،

بس كان نفسى أحب إنسان من صغرنا ونطلع نحب بعض لحد ما نتزوج ، لكن يشاء القدر أن لا يحدث ذلك .

أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا .. ؟

أكيد الرسول عليه أفضل الصلاة والسلام

وسيدنا على بن أبى طالب بحبه قوى خالص.

جدى لأمى كنت بموت فيه وتوفى وأنا عندى عشر سنوات

صلاح جاهين بحب كتاباته جدا

س5/
تحدث عن ستة أسرار قد لا يكتشفها من يقابلك للمرة الأولى ؟

أولا :

إنى خجولة جدا ، مع ظهور جرأتى التى ينتقدها بعض الناس.

ثانيا :

متواضعة جدا .

ثالثا:

عنيدة إلى أقصى الحدود .

رابعا :

بيضحك علىّ بسرعة جدا .

خامسا :

أنى مجنونة بحب الخروج والضحك واللعب والجرى

مع إنى مش بخرج كتير بابا بيخاف علىّ زيادة عن اللزوم .
واخيرااااااااااااااااااااااااااااااا بقي
س6/
تهدي التاج دا لمييييييييين؟

وردتى الحبيبة علشان حاسة إنها زعلانة منى علشان كنت مشغولة عنها الفترة اللى فاتت .

فراشتى الجميلة اللى حاسة إنها زعلانة هى كمان .

أحمد أسير الجراح وده هدية عيد ميلاده

عاشقة الرومانسية

إحساس طفلة محبة للرومانسية بس واقعية

د/ شيرين
بسمة أنور

بسمة صلاح

ريمان

الشاعر الحزين

داليا my corner

حنان حياتى

والباقى اللى عندى على الريدار

هناك 26 تعليقًا:

سمسمه يقول...

بجد رائعه يا شيماء

بس صدقينى كان فى أحلام كتير لو إتحققت كنت حتقواى ياريتنى ما حلمت بيها
ذى وزيرة التربيه والتعليم وكلية العلوم

إسالى مجرب هههههههههه

أسأل المولى عز وجل أن يرزقك خيرى الدنيا والأخره ويرزقك الزوج الصالح والذريه الصالحه النافعه

عاشقة الأحزان يقول...

السلام عليكم


حبيبتى الغاليه وحشتينى موووووت والله العظيم


بسم الله ما شاء الله

احلامك جميله قووى وبسيطه

ربنا يسعد أيامك ويجعلك سعيده يارب

ويحقق ليكى ولو جزء بسيط من اللى بتتمنيه طبعآ اللى فى دماغك انتى

ههههههههههههههه

ربنا يوفقك ياقمرايه

وتسلمى عشان وافقتى تجاوبى على التاج

ربنا يسعدك

تحياتى

انوسه

جارة القمر يقول...

عزيزتي شيمو الأمراية

تاجك جميل متل قلبك

كلنا حلمنا بحاجات كتير ماتحققتش ماتزعليش لعله خير لنا

ربنا يوفقك وتلاقي فارس احلامك

وربنا يرحم جدك

حبيبتي

أوعي يضحك عليكي خليكي جدعة وماتثقي بحد بسرعة

جرأتك ليست عيب بل هي ميزة على ان تكون بحدود

جميلة انتي واكثر

شكرا للتواصل

احترامي

ادم المصرى يقول...

شوشو

رائعه ديما

بجد
احلامك على فكره جميله اوى

ربنا يحققهالك

تاج ميل جدا

جوجو يقول...

السلام عليكم

اجاباتك جميلة

ان شاء الله تقدرى تحققى احلامك

تحياتى

م/ محمد صالح يقول...

بجد لجد انا فخور انى اتعرفت على انسانه زيك ولكن انا عندى تعليق بسيط انا شايف ان الانان لازم يحلم ويدافع عن احلامه الى اخر لحظه فى عمره يعنى بمعنى تانى الحلم الى متحققش زمان ممكن يتتحقق دلوقى خليكى طموعه وعن الحب فلا تستعجلى وجوده ودعيه ياتى فى الوقت المناسب حتى يستحق منك التمسك به فالاستعجال قد بنتج عنه قرار خطأ وعن حلمك بكليه الهندسه يمكن لو كنت دخلتيها كنت غيرت رأيك شويه هى كانت حلمى ومازالت وطموحى بها بلا حدود ولكن منذ ان دخلتها ألى الان وانا اصطدم بأشياء كثيره تفر لى لماذا يتخرج من كليات الهندسه الالاف ويكونوا جميعا مجرد تكرار لا يحاول اى منهم التجديد وان كنت انا مصر ان لا اكون كذلك وبالمناسبه دخولى الكيه دى فسرلى برضه ليه معظم الطلبه فيها مكتئبه ومخنوقه على طول

الرفيق بَرَاء يقول...

احمدي ربنا

وبوسي إيدك وش وظهر على إنك مدخلتيش الهندسة

أنا كل اللي أعرفهم في هندسة

طلعوا منها يا إما مجانين

يا إما مكتئبين

يا إما مرضى نفسيين

أنا كنت فيها ومجرب وعارف يعني ايه كلية هندسة

وأرجوكي بلاش تفكري الفكرة دي تاني خالص ، من باب التصميم على تحقيق الأحلام والإصرار والقوة والكلام من هذا القبيل

لأن الهندسة محتاجة موهبة في المقام الأول
قبل المجهود

على العموم
ربنا يوفقك
وتحققي كل أحلامك
واشوفك سعيدة بقى يا شيمو

تحياتي

الرفيق براء

أسير الجراح يقول...

هههههههههههههههههههههههههههههههة


هدية عيد ميلادى تاج منك

ماشى تدبيسة بقى يعنى مش هدية

عموما ان شاء الله فى اقرب فرصة اجاوب على التاج

بس بصراحة

بسم الله ما شاء الله على اجباتك

بس مش علشان انتى تجوبى على التاج تبعتيلى هدية عيد ميلادى بالسرعة دى

هههههههههههههههههههههههههههة

اوكى يا شيماء بأمر الله حجاوب على التاج فى اقرب فرصة ان شاء المولى

كل الود


اسير الجراح

همس الاحباب يقول...

ربنا يحققللك كل احلامك
وان شاء الله الجااى كله خير
تمنياتى لكى بالسعادة الدائمة
تحياتى

حنان الشافعي يقول...

وحشتيني جدا
اجاباتك جميله
تعرفي اني كمان كان نفسي ادخل هندسه كان حلمي حياتي فعلا
بس ديما بقول الحمدلله علي كل شئ محدش عارف ايه كان ممكن يحصل
وحشتيني فعلا
وعلي فكره عيب نبقو اسكندرانيه ومبنشوفوش بعض كده

أسير الجراح يقول...

السلام عليكم ازيك يا شيمو

والله انا مش عاف مين اللى جى

بس اتمنى بعلقات حضرتك الجامدة

تعرفى مين جى وتبلغينى

بس دة مش سبب علشان انتى ما تجيش يعنى

وبتمنى فعلا تكونى موجودة ان شاء الله اليوم دة


كل الود

اسير الجراح

ريمان يقول...

الله


الله على احلامك كلها رومانسيه كده حتى اما قولتى ان كان نفسك تحبى واحد من وانتم صغيرين وتكبروا مع بعض لاحظت فيكى رومانسيتك اوى وهو حلم جميل اوى اوى بس معلش يا قمر مش كل حاجه بيتمناها الانسان بيلاقيها


بس بيضحك عليكى بسرعه؟


مممممممممممممممم


انا كنت كده

بس لاء خلى بالك بقه يا قمر وفكرى كويس جدا


ربنا يحقق لك كل ما تتمنيه يا رب


على فكره شكرا لاهدائك للتاج ليا بس انا سبقتك من زمان يا قمر وحليته


موااااااااااااااه


بحبك اوى

Eno يقول...

اجابات لو تعني شئ فهي تعني كم انتي انسانه نادرة الوجود بطبعك المحب لله ورسول الله :)

ربنا يكرمك ويرزقك بزوج صالح يكمل سعادتك :)

الشاعر الحزين يقول...

شيموووووووووووو القمر

حرام عليكى والله

دا انا كنت كل ما أقرا التاج ده عند حد من المدونين أدعى ربنا ان محدش يدبسنى فيه

جيتى انتى بقى وعملتى اللى أنا كنت خايف منه

أعمل ايه بقى دلوقتى ؟؟؟؟؟؟

قوليلى أعمل ايه ؟؟؟؟؟؟

أعمل ايييييييييييييييييييييييييه ؟؟؟؟؟

طـــائر الليــــل الحـــــزين يقول...

يااااااااااه
فكرتينى بالأحلام اللى متحققتش خالص
وحتى عمرها هتحقق
بس مش عارفة ليه او ايه السبب
انا زيك على الرغم من انى حلمت بحاجات كتير . الا انى مقدرتش احقق فيها حاجة
بس برده لسه مش يائسة
اجاباتك جميلة قوى كالعادة
وعقبال التاج اللى بعديه
تحيااااااااتى

احساس طفلة محبة للرومانسية بس واقعية يقول...

انا هنا اهو
تصدقى مش كنت عايزة اجاوب
وكل شوية اقول هجاوب على تاج
والناس هتزهق
بس لو اجابتى هتطلع احلام مفيدة كدا
يبقى لازم اجاوب عشان اعرفها انا الاول قبل ما اجاوب
ربنا يحققلك كل احلامك يا احلى وارق شيمو

تقبلى مرورى

الشاعر الحزين يقول...

معلهش أنا بعتذر عن التعليق اللى فات بس غصب عنى أصلى كنت فى حاله تدبيس صعبه قوى

لكن بالنسبه بقى للتاج واجاباتك عليها

أنا حسيت فيكى بالتدين قوى وده أحلى حاجه

لكن عندى تحفظ بسيط

هو ان انتى اتكلمتى عن نفسك من وحهة نظر نفسك أنتى

يعنى ذكرتى مميزاتك وعيوبك من وجهة نظرك أنتى

وده أنا أعتقد ان المفروض الناس هى اللى تحكم عليكى بيه

معلهش يمكن تلاقى كلامى حاد شويه بس ده عشان أنا طبعا بقول اللى حسيت بيه بصراحه بدون مجامله

وعلى العموم حاضر يا ستى هجاوب التاج بس معلهش استنى عليا شويه ماشى ؟؟

سلام بقى

صدفة جميلة يقول...

السلام عليكم ورحمة الله وبركاته
اولا مش عيب اننا نفشل فى تحقيق احلامنا لكن العيب ان ميكونش فيه حلم نسعى لتحقيقه
ثانيا.ليه كلنا بنقول ياريت او كنت دا فعل ماضى انتى الان فى الحاضر ارسمى وخططى حلمك بس حاولى بجهدك ان لا تفشلى يعنى
ارضى بنفسك وبوضعك لانك احسن من غيرك وتمنى تبقى حاجه مش تبقى زى حد
مش عارف اقول ايه بس هاقرء المزيد يمكن اتعرف عليكى اكتر لو تسمحى ليه يعنى ياريت تقبلينى صديق

وردة يقول...

هو انا اقدر ازعل منك ياقمراية
انت حبيبتي يابنتي
ربنا يكرمك
اجابتك علي التاج طبعا جميلة
ربنا يوفقك في حياتك وتكوني افضل زوجة واحسن ام
وتحجي وتشتغلي وتحققي ذاتك
شيمو بجد عمري ما ازعل منك
اشوفك قريب علي خير ان شاء الله
اسفة طبعا علي التأخير بس ظروف والله
ربنا يوفقك ياحبيبتي
سلام

حارة سد يقول...

فكرة التاج بحد ذاتها رائعة لأنها أن قوبلت بصدق في الاجابات تطلعنا بشغف وشفافية عن صاحبة الإجابة وعن شخصيتها

دمتي بخير وتالق وتحقيق لأحلامك

الحارة سد

gogo!sf يقول...

اولا مبروك التاج

وثانيا بقى

اتمنى ان يتحقق كل ما تحلمين به

ويتحول الخيال الى واقع

ردودك بجد جميله وانتى فعلا طبيعيه اوى

بحب الشخصيات الصريحه جدا والطبيعيه اوى

تحياتى يا شيمو القمر

عاشقه الاحزان

جوجو

فراشة يقول...

اولا حمدالله على السلامه رجوعك وطله قمرك الجميل رجعتلنا اخيرا

ثانيا وحشتنا موضوعاتك ومستنين كل جديد عندك

ندخل بقه على التاج
ليه يا شيمو بتقولى ان مالكيش احلام اتحققت
اكيد فى بس ممكن تكونى ناسياها ومش واخدة بالك منها

ربنا يحققلك كل احلامك يارب
اللى كلها خير وحب

حبيبتى شيمو دايما فكرانى بالتاجات الجميلة
بس انا مش زعلانه منك ولا حاجه
انتى ليه بتقولى كده
انا كنت سيباكى الفترة اللى فاتت عشان عارفه انك مشغولة
لكن بجد وحشنى جدا وجودك يا صديقة القمر
عايزين بقه موضوعات قوية وجميلة

عاشقة الأحزان يقول...

شيمو حبيبتى

ربنا ما يحرمنيش منك يارب

واشكرك من كل قلبى

بحبك قووى
انوسه

جريدة الصباح العربي يقول...

شارك معنا باختيار القصيدة او الخاطرة الافضل


عادل فاروق
صورة في برواز
http://sabaharabi.blogspot.com/2009/06/blog-post_3522.html

عبد الله العباسي
ألم بلا أمل
http://sabaharabi.blogspot.com/2009/06/blog-post_9605.html

د/ ايمان مكاوي
ابحث عنك
http://sabaharabi.blogspot.com/2009/06/blog-post_158.html

ايهاب سيد
خائن
http://sabaharabi.blogspot.com/2009/06/blog-post_6557.html

حليس حورية نصيرة
ذكريني
http://sabaharabi.blogspot.com/2009/06/blog-post_5130.html

انتصار طايل
اتوكأ بعصا الحب
http://sabaharabi.blogspot.com/2009/06/blog-post_6044.html

اسلام محمود
بتنساني وبتسبني
http://sabaharabi.blogspot.com/2009/06/blog-post_5269.html

اسراء حامد
لخبطة
http://sabaharabi.blogspot.com/2009/06/blog-post_7682.html

مصطفى محمود
عرفتِ اليوم آياتي
http://sabaharabi.blogspot.com/2009/06/blog-post_9758.html

sky angle
اترك لي هذا المكان
http://sabaharabi.blogspot.com/2009/06/blog-post_13.html

..........................................................................................
ولو عاوز تشارك في مسابقتنا الادبية كل اللى عليك أنك تشترك في الجروب وتتفاعل معنا
جروب جريدة الصباح العربي على الفيس بوك
http://www.facebook.com/groups/edit.php?success=1&customize&gid=78080770039#/group.php?gid=78080770039

تحياتي وتمنياتي للجميع بالتوفيق

E73 يقول...

بسم الله الرحمن الرحيم
السلام عليكم ورحمة الله وبركاته

تاج جميل وردودك واجاباتك اجمل

انت تسال والكمبيوتر يجيب يقول...

سعداءبالمرور هنا وندعوك للأشتراك فى برنامجنا الأذاعى من الأذاعه الرئيسيه لمصر اى أذاعة البرنامج العام ويذاع يومياالتاسعه وعشر دقائق صباحا عدا الجمعه.
سنشير الى مدونتك فى البرنامج اذا لم يكن لديك مانع
وننتظر تعليقاتك على ما نطرحه من اسئله وموضوعات فى مدونتنا وهذه التعليقات تذاع ايضا مع الموضوعات المعلق عليها
وبالمدونه يمكن الأستماع الى حلقات سابقه من البرنامج عن مدونات اخرى نختارها لتميزها.
وبموقعنا تفاصيل اكثر
المدونه
http://netonradio.blogspot.com
الموقع
http://stop.to/cairo
وبالموقع رابط تحت الساعه الى اليسار ليدخلك الى مجموعتنا على الفيسبوك واسمها انا والنت حيث يحكى الزملاء فى المجموعه حكاياتهم مع النت وندعوك للأنضمام اليه
تحاتنا وامنياتنا لك بالتوفيق