الأربعاء، 4 مارس، 2009

عجبى


كلمات تُعبر عن شئ ما بداخلى


بحر الحياه مليان بغرقي الحياه

صرخت خش الموج في حلقي ملاه

قارب نجاه ..

صرخت ..

قارب نجاة

قالوا مفيش غير بس

هو الحب قارب نجاه

عجبي !!!


يا باب يا مقفول ...

إمتي الدخول

صبرت ياما و اللي يصبر ينول

دقيت سنين ...

و الرد يرجع لي : مين ؟

لو كنت عارف مين أنا كنت أقول

وعجبى !!..


يأسك وصبرك بين ايديك

وانت حر

تيأس ما تيأس الحياة راح تمر

دقت من دة ومن دة

وعجبي لقيت

الصبر مر وبرضه اليأس مر

عجبي !!..


أنا شاب لكن عمري ألف عام

وحيد لكن بين ضلوعي زحام

خايف و لكن خوفي مني أنا

أخرس و لكن قلبي مليان كلام

عجبي !!!!


يا للي بتبحث عن إله تعبده

بحث الغريق عن أي شيء ينجده

الله جميل و عليم و رحمن رحيم

إحمل صفاته ... و انت راح توجده

عجبي !!..


يا للي انت بيتك قش مفروش بريش

تقوى عليه الريح.

يصبح مفيش

عجبي عليك حواليك مخالب كبار

و ما لكش غير منقار

و قادر تعيش

عجبي !!..


يا حزين يا قمقم تحت بحر الضياع

حزين أنا زيك و إيه مستطاع

الحزن ما بقالهوش جلال يا جدع

الحزن زي البرد ... زي الصداع

عجبي !!..


حبيت...لكن حب من غير حنان

وصاحبت لكن صُحبه مالهاش أمان

رحت لحكيم واكتر لقيت بلوتي

إن اللي جوّه القلب مش ع اللسان

عجبي !!..


إيش تطلبي يا نفس فوق كل ده

حظك بيضحك وانتي متنكدة

ردت قالت لي النفس:

قول للبَشَر

ما يبصوليش بعيون حزينة كده

عجبي!!..


فتحت شباكي لشمس الصباح

ما دخلش منه غير عويل الرياح

وفتحت قلبي عشان أبوح بالألم

ما خرجش منه غير محبة وسماح

عجبي !!..


إنشد يا قلبي غنوتك للجمال

وارقص في صدري من اليمين للشمال

ماهوش بعيد تفضل لبكره سعيد

ده كل يوم فيه ألف ألف احتمال

عجبي !!..

عمنا صلاح جاهين

هناك 33 تعليقًا:

ادم المصرى يقول...

يا للي انت بيتك قش مفروش بريش

تقوى عليه الريح.

يصبح مفيش

عجبي عليك حواليك مخالب كبار

و ما لكش غير منقار

و قادر تعيش

بجد انا مش عارف اقولك ايه

كلامك

عجبى

كتييير رائع

كلام سياسى

دبلوماسى

دينى

رومانسى

اقتصادى
اجتماعى

كل شيئ اكتب وكلو اتقال

طب اقول ايه
بجد

مشاء الله عليكى

وبنا يزيدك من علمو

ويجعلك لناس بريق

تلمعى به

وتزدهرى له

سلامى ليكى ولكل من يقرأ

هذه الامجاد امجادك

وقلمك سيكون فؤادك

BAsMA يقول...

صلاح جاهين
يااااااااااااه راجل عظيم اوى
وكلام جميل جدا

Eno يقول...

إنشد يا قلبي غنوتك للجمال
وارقص في صدري من اليمين للشمال
ماهوش بعيد تفضل لبكره سعيد
ده كل يوم فيه ألف ألف احتمال
عجبي !!..

مااجمل كلمات صلاح جاهين

تحياتي ليكي علي البوست الهايل ده :)

Abo 7anf يقول...

السلام عليكم
جميله عبارات يوسف شاهين
وان كنتى اختارتى جانب فيه الحزن اكتر
متخليش الحزن اكتر من كدا

romansy يقول...

ومين يقدر على الكلام الحلو دا

عمنا صلاح جاهين استاذ كبير

فراشة يقول...

اول مرة اخد بالى ان اول جملة فى عجبى شبه العبارة اللى انا كتباها فى مدونتى بس دى صدف طبعا
الاصل :كلمات تُعبر عن شئ ما بداخلى
وانا كاتبه :كلمات بسيطة تعبر عما بداخلى
بجد اتبسطت قوى من هذا التشابه
طبعا الرائع صلاح جاهين سابق عصره وقال عجبى على كل الى بيحصل فى ايامه وبقى اضعاف مضاعفه دلوقتى
وفعلا مافيش تعليق ممكن يتقال غير عجبى
تحياتى لشيمو الجميلة القمر

اعترافات قلب يقول...

آدم المصرى
___________
أنا مش قد الكلام ده كله

ده كلمات العظيم عمنا صلاح جاهين

بس حسيت إنها بتقول حاجة جوايا ، فكتبتها.

تحياتى
شيمو القمر

اعترافات قلب يقول...

basma
______
طبعا ده عمنا صلاح جاهين أعظم راجل قرأت كلامه

تحياتى

اعترافات قلب يقول...

eno
_______
ما أجملها من كلمات

وهناك الكثير من الكلمات التى تحمل بداخلها آلاف التجارب

مرسيه إينو
شيمو القمر

اعترافات قلب يقول...

abo _7anf
___________
وعليكم السلام ورحمة الله وبركاته

أكيد جميلة كلمات صلاح جاهين

يمكن الحزن أكتر ، بس برده بها بعض التفاؤل.
أشكرك على زيارة مدونتى المتواضعة

تحياتى

اعترافات قلب يقول...

romansy
_____________
ومين يقدر عليها يا رومانسى

بس غريبة انك مش أول تعليق

بس ملحوقة البوست الجاى

تحياتى

اعترافات قلب يقول...

فراشة
______
لا بصراحة هى مش أول عبارة فى عجبى ده كلمتى أنا كتبتها على الشعر بتاع صلاح جاهين وقلت إن شعر صلاح جاهين يعبر عن شئ بداخلى أنا علشان كده كتبتها بلون مختلف .
عندك حق مفيش تعليق يتقال سوى عجبى !!..
تحياتى
شيمو القمر

Batoooot يقول...

السلام عليكم
اول زياره بجد جميل تسلم اديكى
وعمنا صلاح جهين
استاذ الكل
تحياتى
بطوووط

اعترافات قلب يقول...

batooooot
_____________
على فكرة ده مش أول زيارة ليه

على العموم أشكرك على زيارة مدونتى المتواضعة .

أكيد أستاذ الكل

تحياتى
شيمو القمر

blue-wave يقول...

الله عليك يابو جاهين

ريمان يقول...

حبيبه قلبى

ازيك يا قمرررررررررر


وحشانى والله

جداااااااااا

يا رب تكونى بخير

بس ايه البوست العسل ده

بوست فريد من نوعه اصلا

وبجد احيى قلمك المبدع ده

ومش عارف بجد اقول ايه تانى

بس بجد رائعه زى ما عودتينا

اعترافات قلب يقول...

ريمان
_________________

أنت أكتر كنت مفتقدة تعليقك وكنت بانتظاره .
أنا الحمد لله كويسة بخير بإذن الله .
مرسيه على رأيك
بس ده يا بنيتى :
عمنا الكبير صلاح جاهين وأنا أخذت مقتطفات من شعره تعبر عنى ونشرتها وكتبت ذلك فى آخر البوست

تحياتى يا عسولة

شيمو القمر

طـــائر الليــــل الحـــــزين يقول...

تمااااااااااام
بصراحة اختيار جميل لكلمات من احلى كا كتب صلاح جاهين
بجد جميلة قوى وليها معانى اكتر من اللى فى الكلمات نفسها
تحياااااااااااتى

”*°•.˜”*°•..سونه..•°*”˜.•°*”˜ يقول...

السلام عليكم .
والله شطره وجدعه ان انتى تخلينا نشوف الكلام اروعه ده
اراجل ده بيحس بينا اوىىىىىى


حبيت...لكن حب من غير حنان


وصاحبت لكن صُحبه مالهاش أمان


رحت لحكيم واكتر لقيت بلوتي


إن اللي جوّه القلب مش ع اللسان


عجبي !!..
بجد كلام جميل وروعه تحياتى ليكى
وانا سعيده بوجودك عندى
سلام (***سونه***) .

بس خلاص ... يقول...

يأسك وصبرك بين ايديك


وانت حر

تيأس ما تيأس الحياة راح تمر

دقت من دة ومن دة

وعجبي لقيت

الصبر مر وبرضه اليأس مر

عجبي !!..
موفقة جدا فى اختيارك لصلاح جاهين .. كلماته تسرى من العروق مسرى الدم واجده فى كل مايواجهنا من مواقف
اعترف لك من كل قلبى انك انسانه جميله

عاشقه الرومانسيه يقول...

نا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!!

طبعا كل ده مفيش فيه كلمهده عمى انا
عمى صلاح جاهين
اقول ايه بس يابنتى دى حكايه عشك للراجل ده معايا
الله يفتح عليكى

اعترافات قلب يقول...

طائر الليل الحزين
______________________
مرسيه على رأيك

أكيد ليها معانى كتيرة غير اللى فى الكلمات ده صلاح جاهين برده

أشكرك على زيارتى
تحياتى
شيمو القمر

اعترافات قلب يقول...

سونة
_________________

أنا شاطرة كده شكرا خلاص يبق أخد 100% وأنجح

على فكرة المقطوعة ده اثرت فـىّ قوى

وأنا أسعد بوجودك
تحياتى لك
شيمو القمر

اعترافات قلب يقول...

بس خلاص
_____________

أشكرك لموافقتك باختياراتى
وأشكرك على رأيك فـىّ
وأنت أجمل صدقينى

تحياتى
شيمو القمر

اعترافات قلب يقول...

عاشقة الرومانسية
_______________________

مرسيه لتعليقك
بس أنا لم أستطع تزويق الكلام لذلك اسم مدونتى اعترافات بدون أى رتوش
أنا لم أستطع فهم شئ من تعليقك
لماذا عمك أنت وليس عمنا نحن كمان

ممكن لو تتكرمى علـىّ بأن تكتبى لى التعليق مرة أخرى .

على فكرة أنا بحبك بجد
تحياتى يا أجمل رومانسية شفتها
شيمو القمر

وردة يقول...

عارفة جيت بردو متأخرة
بس والله مش بأيدي
وعلشان خاطر الكلام الحلو اوووي اللي انتي اخترتيه من كلامك المبدع صلاح جاهين
سماح المرة يه كمان
تسلم ايديك ياقمر
ربنا يكرمك
سلام ياحبيبتي

اعترافات قلب يقول...

وردة حبيبتى
____________
عادى يا حبيبتى بس ببقى منتظرة ردك وتعليقك ولعل يكون المانع خير .

أكيد هو مبدع علشان يكتب كلام بالاحساس ده وبمشاكل عصره وده طبعا مكرر فى عصرنا نحن
تحياتى يا حبيبتى
شيمو القمر

حاجات جوايا يقول...

إزيك يا جميل

كلمات رائعة طبعا للمبدع صلاح جاهين
احسنتى الاختيار

وأضيف عليهم
************


مع إن كل الخلق من أصل طين
وكلهم بينزلوا مغمضــــين
بعد الدقايق والشهور والسنين
تلاقي ناس أشرار وناس طيبين
عجبي!!


عجبي عليك..عجبي عليك يا زمن
يا بو البدع يا مبكي عيني دمـاً
ازاي أنا أختار لروحي طريق
وأنا اللي داخل في الحياة مرغماً
عجبي!!


مرغم عليك يا صبح مغصوب يا ليل
لا دخلتها برجليا ولا كان لي ميل
شايلني شيل دخلت أنا في الحياة
وبكره ح اخرج منها شايلني شيل
عجبي!!


سنوات وفايته عليّا فوج بعد فوج
واحدة خدتني ابن والتانية زوج
والتالتة أب خدتني والرابعة ايه
ايه يعمل اللي بيحدفه موج لموج
عجبي!!


وانا في الضلام من غير شعاع يهتكه
أقـف مـكــاني بخوف ولا اتركه
ولما ييجي النور واشوف الدروب
أحتار زيادة .. أيهم اسلكه؟
عجبي!!


تحياتى يا جميلة
وكل سنة وانتى طيبة بمناسبة المولد النبوى الشريف اعاده الله عليكى وعلى الامة الاسلامية بالخير والبركات

سالى

اعترافات قلب يقول...

حاجات جوايا
____________
الحمد لله كويسة وانت؟

طبعا كلمات رائعة
وأنت اختياراتك جميلة بس على فكرة الكلمات ده عندى بس لما انا اخترت هذه الحروف اللى نشرتها لأنى حسيتها قوى مع إنها كان ما بينها مقطوعات أخرى .
وأخيرا أشكرك على زيارة مدونتى المتواضعة وأتمنى تكرارها
تحياتى يا عثل
شيمو القمر

blue-wave يقول...

انا علقت بس مارديتيش عليا
ياترى ليه؟

اعترافات قلب يقول...

blue wave
_____________
سورى بجد بس نسيت
أو ماخدتش بالى

وآدى التعليق

فعلا يا سلام عليك
يا أبو جاهين جامد بجد

أشكرك على زيارتى ولا تزعل منى " جل من لا يسهو "
تحياتى
شيمو القمر

كاتب مصري يقول...

انتي نسيتينا ولا ايه..مدونتي بتنادي والله
مش هكتب تعليقي ع الكلام الحلو ده غير لما تفتكري ان في واحد متابعك بس انتي عاملة مش واخدة بالك
ربنا يوفقك ويكرمك يارب
مودتي

kalamfady يقول...

صلاح جاهين .....كلام جميل